Masarangan ayhan sang tawo nga lutuson ang robot? Ukon masarangan ayhan sang robot nga himuon ang mga masarangan sang tawo?
Sa China, may ara sang isa ka interesante nga kumpetisyon nga ginabantayan sa capital city sa Beijing kun sa diin magatipon ang linibo ka mga tawo nga runners nga magapa-indis-indis batok sa bipedal robots.
Indi lang ini basta-basta nga mga robot bangud produkto sila sang nagapanguna nga robotics companies sa kalibutan kaangay sang Tesla, Boston Dynamics kag 1X.
Matabo ang kumpetisyon sa Abril kun sa diin ang host amo ang Beijing Economic-Technological Development Area (E-Town).
12,000 ka mga tawo ang ginalauman nga magapasakop kag dinosena nga bipedal robots sa amo nga half-marathon.
Para nga makapasakop ang robot, dapat nga may yara ini sang human-inspired appearance kag dapat nga ang kataason sini ang limitado lamang sa 0.5 tubtub sa 2 metros.
Ang winner sa kumpetisyon — tawo man ukon robot — ang makabaton sang padya nga kuwarta depende sa ila nga performance.
May mga eksperto nga nagasiling nga ang seasoned human runners ang may yara sang edge batok sa bipedal robots. Ginapahayag nga ang range sang robot ang yara lamang sa 8 to 12 km/h, magluwas pa nga isa pa ka factor ang battery autonomy. Antes sini, nag-anunsyo naman ang organizers nga tugutan nila ang pag-ilis sang baterya samtang padayon ang karera.
May yara man anay sang robot sa South Korea nga nag-compete sa official running event sang 2024, apang indi ini maka-intra sa half-marathon sa China sa Abril bangud bukas lamang ang kumpetisyon sa Beijing para sa bipedal robots.
