Nakahanda ang Overseas Workers Welfare Administration (OWWA) Region 6 sa tion nga may patigayunon nga mass deportation sang mga undocumented Overseas Filipino Workers (OFW) sa Amerika.
Ini ang kasunod man sang ginpagwa nga executive order ni United States President Donald Trump nga nagamando sa mas hugot nga immigration policies.
Sa interview sang Bombo Radyo kay Mr. James Mendiola, Regional Director sang OWWA Region 6, iya ginpahayag nga preparado na sila sa pagpanguna sang ila Central Office sa ginalauman nga mass deportation.
Suno kay Mendiola, sa tion nga matabo ini, may yara sila sang ihatag nga bulig sa mga i-deport nga OFW.
Ang gobyerno man sang Pilipinas suno sa natungdan ang mabayad sang ila pagkaon kag pamasahe partikular sa eroplano.
Magluwas diri, may libre man nga accommodation nga ihatag ang OWWA.
Nakahanda man suno sa natungdan nga magbulig ang iban pa nga ahensya sang gobyerno kaangay sang Department of Migrant Workers (DMW), Department of Foreign Affairs (DFA) kag iban pa.
Santo naman sa record sang non-profit organization nga Filipino Migrant Center (FMC), isa sa apat ka mga Filipinos sa U.S. ang undocumented.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
