Kun kaisa, sa kadamo sang ulubrahon, gusto man naton makapahuway, maka-liwa-liwa, kag makalagaw kaupod sa aton nga mga abyan.
Wala man dira sang problema.
Ang problema amo kun naga-himu-himo na ikaw sang indi makatarunganon nga mga rason agud nga maka-eskapo sa trabaho.
Kaangay sa natabo sa Singapore kun sa diin isa ka lalaki ang ginmultahan kag napuno pa sang pagpakamalaot matapos napamatud-an nga ginhimu-himo lang sini ang death certificate sang iya nga Lolo agud nga maka-leave with pay sa opisina.
Natabo ini sa 29-anyos nga si Barath Gopal nga isa ka security financing operation analyst.
Isa ka adlaw, nahibal-an sini nga nag-cheat ang iya girlfriend sa iya gani nga indi siya maka-focus sa iya obra.
Sa baylo nga mag-apply para sa iya annual leave, mas gin-gusto sini ang paid compassionate leave sa sulod sang tatlo ka adlaw.
Ginrason sini nga napatay ang iya Lolo sa India apang nangin mas kumplikado ini sang ginpangayuan siya sang death certificate.
Bangud indi na sini ma-islan ang iya rason, gingamit sini ang death certificate sang himata sang iya abyan, gin-ilog, kag naghimo sang dokumento kun sa diin nakabutang ang pangalan sang iya Lolo.
Indi man galling mahapos intuon ang supervisor bangud nagduda ini sa dokumento.
Nag-send man si Barath sang bilog nga document, apang bangud nakahibalo siya nga madiskubrehan ang iya pagbinutig, nag-resign na lang siya sa trahabo.
Unfortunately para sa iya, ginlagas gid siya sang kumpaniya, ginkasuhan, tubtub nga nag-plead ini nga guilty sa pag-forge sang death certificate nga may intensyon nga maghimo sang fraud.
Kun amo sini ang imo sala sa Singapore, tubtub sa $10,000 ang multa ukon mahimo ka mapreso sang 10 ka tuig ukon pareho gid nga sentensya ang imo makuha.
Maswerte na si Barath nga masobra P230,700 lang ang iya multa apang nagserbe man nga daku nga leksyon nga indi na maghimu-himo sang kaangay nga istorya.
