Naka-schedule sa Miyerkules, Pebrero 19, ang hearing sang Land Transportation Franchising and Regulatory Board (LTFRB) sa pending petition nga ipasaka sa P15 ang minimum fare sa jeep.
Suno kay LTFRB technical division head Joel Bolano, amo ini ang request sang nagkalain-lain nga transport groups nga ginpasa sang nagligad pa nga 2023.
Sang amo nga tion, wala ini ginpasugtan. Sa baylo, gin-grant sang LTFRB ang piso nga provisional increase kun sa diin, halin sa P12, ginpasaka sa P13 ang plete sa traditional jeepneys samtang halin sa P14, nahimo naman nga P15 ang para sa modern jeepneys.
“The petition was to increase the minimum fare to P15 from the current P13,” suno kay Bolano kaangot sa pending request.
Sang nagligad nga bulan, matandaan nga nagsiling ang regulatory board nga ginarepaso pa nila ang petisyon nga pasakaan ang minimum fare bangud madamo nga transport groups ang nag-petisyon para sa pagpataas sa plete.
Nagsabat ang ahensya nga lakip sa ila nga ikonsiderar amo ang trend sa pagsaka sa presyo sang gatong, ang inflation rate, kag ang kabug-usan nga economic impact sa mga commuter.
Nagsiling man ang public land transport regulator nga igakonsiderar man sini ang posible nga epekto sang requested minimum fare hike sa riding public.
