Umpisahan sang Department of Health (DOH) ang “Alas Kwatro, Kontra Mosquito!” campaign sa Lunes, Pebrero 24, bilang parte sang mas masangkad nga kampanya kaupod ang government agencies kontra sa dengue sa bilog nga Pilipinas.
Suno sa ahensya, magasugod ang “Nationwide Search and Destroy Mosquito Breeding Sites Campaign” alas kuwatro sang hapon.
Gina-engganyo ang mga komunidad nga manglimpyo sa mga gina-istaran sang lamok agud makalikaw sa pagdugang sang kaso.
Sa Iloilo, partikular nga na-mensyonar ang Barangay Bolong Oeste, Sta. Barbara kag ang banwa sang San Dionisio nga nagakinahanglan sang partisipasyon sang publiko.
Sa latest data sang ahensya, may 28,234 dengue cases sa pungsod halin sang January 1 tubtub sang February 1 nga may 40% increase ipaanggid sa amo man nga period sang 2024.
Base naman sa latest record sang Iloilo Provincial Health Office (IPHO), nalapawan na ang alert kag epidemic thresholds sa dengue nga buot silingon nagakinahanglan sang madasig nga intervention.
Sa interview sang Bombo Radyo kay Dr. Maria Socorro Colmenares-Quiñon, head sang IPHO, iya ginpahayag nga halin sang Enero 1-Pebrero 15, naka-rekord ang probinsya sang 592 dengue cases kun sa diin lima ang patay.
May 77% ini nga pagsaka ipaanggid sa record sang 2024 nga may 335 cases kag isa ka patay sang amo man nga period.
Ang mga banwa nga may nagapanguna nga numero sang kaso amo ang Leon (33), Oton (32, isa ang patay), San Joaquin (32), Dumangas (31), Cabatuan (28), Lambunao (24), San Dionisio (23), Banate (20), Janiuay (19), kag Tigbauan (19, isa ang patay).
