Matakos liwat ang pwersa sang Gilas Pilipinas sa katapusan sini nga hampang sa 2025 FIBA Asia Cup Qualifiers.
10:00 subong nga aga oras diri sa Pilipinas, atubangon sang Gilas para sa rematch ang New Zealand nga may kapareho nga 4-1 win-loss record.
Tyansa ini sang Gilas nga makabangon matapos gintambakan sang Chinese Taipei, 91-84, sang nagligad nga Huwebes sang gab-i nga amo ang naghatag sa national team sang una nga kalutusan subong nga qualifiers.
Bisan nga pareho na nga kuwalipikado ang Gilas kag New Zealand sa FIBA Asia Cup 2024 sa Saudi Arabia sa Agusto, ang resulta sang hampang subong nga aga amo ang magatumod kun sin-o sa ila ang mangin top-seeded.
Ang magapanguna sa Group B amo ang makakuha sang mas paborable nga draw sa tournament proper sa Jedah.
Sa ila una nga pag-atubangay sa second window sang qualifiers sang Nobyembre, matandaan nga nalutos sang Gilas ang Tall Blacks, 93-89, nga amo ang una nga kadalag-an sang Pilipinas batok sa New Zealand sa maragtas sang FIBA.
Lain ugaling ang mangin dalagan sang ball game sa rematch subong bangud wala si Kai Sotto nga naka-skor anay sang 19 points, 10 rebounds, 7 assists, 2 steals, kag 2 blocks para sa ila una nga hampang.
Sa hampang batok sa Taiwan sang nagligad, ginhakwat ni Justin Brownlee ang Pilipinas nga may 39 pts lakip ang 8-of-11 shooting sa three-point line apang ginkabos sa gihapon.
Preska naman ang Tall Blacks sa kadalag-an batok sa Hong Kong, 92-51.
