Ginpaguwa ni Iloilo City Mayor Jerry Treñas ang mga litrato ni Public Information and Community Affairs Office Chief Nereo Lujan nga ginaalegar nagagamit sang van sang Iloilo Provincial Government nga indi sakop sang iya trabaho.
Nakit-an si Lujan nga nanaog sa van sang Iloilo Provincial Government kag ginpalapitan kag namangkot sa Anti-Squatting and Illegal Structures Unit (ASIS-U) kun ngaa ginbaklas ang campaign poster nga nakapaskil sa isa ka private building sa Diversion Road, Mandurriao.
Depensa naman ni Lujan, wala ini nagagamit sang salakyan sang gobyerno para sa iya public interest bangud ang litrato nga nakuha sang alkalde amo ang adlaw nga nagbaton ini sang award nga Best Performing Information Office (Provincial Category) sa Western Visayas Information Officers Regional Summit.
Suno sa iya, padulong siya sa venue sang awarding sang iya nalabayan ang ASIS-U kag namangkot sang ila ginahimo bangud nga yara man sa private building ang campaign poster.
Sa facebook post naman ni Lujan, iya ginpahayag nga ang paggamit sang government resources para sa personal use ang makabig nga grave concern.
Yari ang post ni Lujan:
”Mayor Jerry Treñas has accused me of misusing government resources, specifically alleging that I have used my office’s service vehicle for personal errands. Yet, if we are to scrutinize the use of public resources, should we not also examine how his daughter, Raisa Treñas, is benefiting from government programs and activities?”
