Nag-file sang resolution si Senate Minority Floor Leader Aquilino “Koko” Pimentel III agud nga ma-imbestigaran sang nagakaigu nga committee sa Senado ang mga insidente sang pagkarumpag sang mga taytay sa lain-lain nga parte sang Pilipinas.
Ang pinakaulihi nga nag-collapse amo ang portion sang bag-o lang nabuksan nga Cabagan-Sta. Maria Bridge sa Isabela matapos nga gin-agyan sang dump truck.
Anum ka mga tawo ang napilasan sa amo nga hitabo.
Sa ginproponer nga Senate Resolution No. 1319, ginsiling ni Pimentel naglab-ot na sa maka-alarma nga lebel ang numero sang nagakarumpag nga mga taytay.
Gin-cite sini nga may nagakapilasan kag nagakapatay kag may pierde man sa pondo. Ini ang rason suno sa iya nga dapat lantawon ang kakulangan sa engineering kag desinyo, paggamit sang substandard materials, kakulang sang proper oversight, kag posible nga kurapsyon sa mga proyekto sa imprastraktura.
Ang iban pa nga mga taytay nga nag-collapse kag ginpangmensyonar sa resolution amo ang:
Magapi bridge sa Balete, Batangas – October 28, 2024
Bantilan bridge nga naga-tabo sang Batangas kag Quezon – October 29, 2022
Carlos Romulo bridge sa Bayambang, Pangasinan – October 20, 2022
Borja bridge sa Bohol – June 16, 2022
Loay-Clarin bridge sa Bohol – April 27, 2022
Bridge under construction sa Kulafu, Magsaysay, Marilog District sa Davao City – February 18, 2022
Steel bridge sa Barangay San Isidro Majayjay, Laguna – January 19, 2022
Ginsiling pa sa resolusyon nga binilyon ka pesos ang ginagasto diri apang nagakausik lang bangud sa madasig nga pagka-rumpag nga nagadala man sang risgo sa kabuhi sang iban.
Paagi sa inquiry, tuyo suno kay Pimentel nga mapasabat ang responsable nga public officials; kontraktor; kag iban pa nga mga partido nga involved.
Sa taytay sa Isabela nga nagabalor sang P1-2-billlion apang narumpag sang nagligad lang nga semana, naglunsar na sang imbestigasyon ang Department of Public Works and Highways.
