Isa ang patay kag linibo na ang nag-evacuate bangud sa lapnagon nga wildfires nga padayon nga nagalamon sa east coast sang main island sa Japan.
Nagakatabo ini sa Ofunato sa Iwate prefecture kag halos nag-doble na ang kalaparon sa nagligad nga tatlo ka adlaw.
Ini man ang ginakabig nga pinakadaku nga wildfires sa Japan sa sulod sang 33 ka tuig nga subong nakalamon na sang 1,800 hectares (4,500 acres).
Suno sa Japan fire and disaster management agency, malapit na sa 100 ka mga balay ang nahalitan, samtang ang bangkay naman ang nasapwan sa Shoji district sa Sanriku-cho Ryoiri.
Masobra naman sa 3,600 ka mga residente ukon halin sa 1,300 households ang ginbakwit sa mas hilway nga mga lugar. Ginsirado man ang mga eskwelahan kag ginsuspinde ang byahe sang tren sa apektado nga mga lugar.
Nagdangat naman sa malapit 2,000 ka mga bumbero ang ginpadala agud nga mapalong ang kalayo.
