Nagpaguwa sang show cause orders ang Commission on Elections (Comelec) sa anum ka mga kandidato sa pagkasenador bangud sa paglapas sa layi sa eleksyon kaangot sa campaign posters.
Suno sa komisyon, pila sa mga materyales sang sini nga mga kandidato ang iligal nga nakapaskil, indi eco-friendly, kag may yara pa nga ginpang-lansang sa mga kahoy.
Madamo ang naakig sa sini nga buluhaton bangud maapektuhan gid ang kahoy bangud mahimo ini madunot bangud sa lansang.
Ginpaathag naman ni Comelec Chairman George Garcia nga ginadumilian sang election laws ini nga practices kag ginapangabay gid nga sundon ang eco-friendly campaign.
“Hindi ba meron tayong environmentally sustainable election? Eh may buhay po yung puno. Di ba kahit nga kayo, pakuan nga kayo, kahit kuko lang, masakit eh. Eh puno rin naman. Ganoon din yan,” suno sa hepe sang poll body.
Ginpahanumdom man sa mga kandidato nga ang posters ang dapat ibutang lamang sa designated areas kag indi sa public buildings ukon sa mga eskwelahan.
Gindugang sang poll body nga napahibalo na ang natungdan nga mga kandidato nga kakason ang iligal nga mga materyales, samtang ang Department of Environment and Natural Resources (DENR) ang maga-handle sa anuman nga environmental law violations.
