Nagapakig-angot pa ang Commission on Elections (Comelec) sa Philippine consulate sa Hong Kong kaangot sa nagalapta nga mga impormasyon nga may vote-buying nga natabo sa isa ka political rally nga ginhimo sa amo nga lugar.
Suno kay Comelec Chairperson George Erwin Garcia, ikumpirma man sang poll body ang social media posts nga nagaalegar nga kada overseas Filipino voter nga nagtambong sa kampanya ang nakabaton sang HKD200 (ukon ginabanta P1,500).
Base sa social media posts, ginpanagtag ang kuwarta para nga botohon ang senatorial candidates sang isa ka grupo, apang suno sa Comelec, wala sang complaint ukon letter nga nabaton ang poll body kaangot sa amo nga report gani sa subong, makabig ini nga “raw information.”
“May nakarating sa ating balita at impormasyon sa bagay na ‘yan na allegedly para iboto ng straight ang mga pumunta ng Hong Kong, pero ‘yan ay kinakailangang i-verify nang mabuti…baka ‘yan ay fake news,” suno kay Garcia.
“Tayo po ay nakikipag-communicate sa ating konsulada sa Hong Kong para makakuha ng mga balita tungkol sa bagay na ‘yan,” dugang sang opisyal.
Gin-athag sini nga wala sang hurisdiksyon ang Comelec kun ang isa ka krimen ang nahimo sa guwa sang Pilipinas, apang bangud sa alegasyon nga vote buying ini, imbestigaran gihapon ini sang poll body bangud bisan indi sila mangatubang sang kaso-kriminal, pwede sa gihapon ang disqualification cases.
“Maaaring walang criminal case pero pupwedeng magkaroon ng disqulification cases kahit pa na-commit outside the Philippines. Inuulit ko, wala itong katotohanan pa sa kasalukuyan, wala pa tayong nare-receive na credible evidence to prove ang mga bagay na yan,” dugang sini.
Pananglitan mabaton na sang Comelec ang letter sang mga naga-reklamo, iga-endorso ini sa Committee on Kontra Bigay.
Ini nga komite ang gin-relaunch sang Comelec sang Pebrero para sa mas istrikto nga mga pagsulundan batok sa vote-buying, vote-selling, kag pag-abuso sang state resources nga lunsay makabig nga election offenses.#
