Gin-athag sang Malacañang nga indi sini makontrol kun sin-o sa senatorial candidates sang administrasyon ang magkadto ukon indi sa ila mga pagpangampanya.
Ginpahayag ini ni Palace Press Officer Undersecretary Atty. Claire Castro sang ginpamangkot sa reaksyon kaangot sa pag-absent sang pila sa mga kandidato ni President Ferdinand Marcos, Jr. sa rally sang Alyansa Para Sa Bagong Pilipinas sa Tacloban sang nagligad nga semana.
Lakip sa absent amo sanday Senators Imee Marcos, Pia Cayetano kag Las Piñas Representative Camille Villar. Si Imee nga magulang sang presidente ang una na nagprangka nga indi siya magtambong sa rally bangud indi niya mabaton ang pag-aresto kay former President Rodrigo Roa Duterte sang Martes, Marso 11.
Suno naman kay Castro, indi na ma-handle sang Malacañang kun ano ang batyagon sang ila kaupdanan. Dugang sini, indi siya sigurado kun sin-o gid ang ginaapinan sang pila ka mga kandidato, gani pabay-an na lamang sila.
”Hindi po natin saklaw ang kanilang damdamin,” suno kay Castro. “Kung nalungkot po sila, hindi po natin saklaw ang kanilang damdamin. Isipin na lamang po nila, malapit na po ang eleksiyon, ito ba ay makakaapekto sa mga boto ng tao. Hindi ko po alam kung namamangka sila sa dalawang ilog at hayaan na lamang po nila—hayaan na lang po natin ang kanilang mga damdamin na ganiyan.”
Apang suno kay Castro, kun si President Marcos ang pahambalon, wala ini nagapati nga makaapekto ang latest nga mga nagakatabo sa pulitika sa kampanya sang Alyansa slate.
”Sa tingin po ng Pangulo, hindi makakaapekto; hindi ko lang po alam individually kung makakaapekto,” dugang sang Palace Press officer.#
