Ipauntat sang National Historical Commission of the Philippines ang plano sang local government unit sang Dingle nga pagguba sang makasaysayan nga hagdan sang St. John the Baptist Church sa nasambit nga banwa.
Madugay na nga nagaguwa ang impormasyon nahanungod sa pag-demolish sang hagdan apang ginkaalarma ini subong sang mga pumuluyo bangud sa mga nakit-an nga backhoe malapit sa simbahan.
Apang nagapadayon subong ang amat-amat nga pagkaayo sang plaza nga madugay man nga nag-untat.
Ang simbahan ang yara lang sa tabok sang plaza sang banwa.
Marso 3, 2025, nag-issue ang National Historical Commission of the Philippines sang Cease-and-Desist Order (CDO) ukon pagpauntat sang tanan nga aktibidad nga makaapekto sa hagdan sang nasambit nga simbahan.
Ginpahibalo ni NHCP Chair Regalado Trota José Jr. si Dingle Mayor Rufino Palabrica III nga ang 19th-century staircase, bilang Important Cultural Property (ICP), ang ginaprotektahan gikan sa ano man nga modification ukon demolition.
Nahibaluan nga nag-request ang LGU sang Dingle sa Archdiocese of Jaro nga i-demolish ang hagdan bilang kabahin sang nagapadayon nga redevelopment sang drainage sang public plaza.
Suni kay José, nagakadapat nga ginakonsulta ang NHCP sa ano man nga intervention nga makaapekto sa integridad sang istruktura antes ang implementasyon.
Ginmanduan man sini ang alkalde nga magpasa sang pirmado nga development plan para sa redevelopment sang plaza sa diin nagakadapat nga pagasundon ini sa National Cultural Heritage Act of 2009.
Sa tion nga indi masunod ang nasantu sa National Cultural Heritage Act of 2009 pahayag niya, magapasaka ang NHCP sang kaso batuk sa LGU.
