ILOILO – Ginkumpirma sang kapulisan nga ang Overseas Filipino Worker (OFW) nga nagatrabaho sa Saudi Arabia ang naghingyo sa iya pamilya nga magpangayo sang bulig agud ma-rescue ang iya duha ka mga kabataan nga ginapahayag ginsakit sang iya bana sa Barangay Compo, San Enrique, Iloilo.
Sa interview sang Bombo Radyo kay Police Lieutenant Christy Val Dalde, hepe sang San Enrique Municipal Police Station, iya ginpahayag nga nagpadala ang bana sang video sa iya misis nga OFW sa diin makit-an nga ginagapos kag ginasakit sini ang iya duha ka mga kabataan.
Suno kay Dalde, ang nagapanguna nga rason sa pagkaakig sang bana amo ang nabaton sini nga video sang iya misis nga nagahimo sang isa ka sexual activity samtang yara sa luwas sang pungsod.
Ginkumpirma man sang hepe nga duha ka beses na nga natabo ang ginapahayag pagsakit sang amay sa duha ka mga kabataan.
Apang sang nagpadulong ang mga pulis sa nasambit nga barangay, wala sang anuman nga hostage nga natabo.
Nahibaluan nga sang nagligad nga Disyembre, may kaangay man nga insidente nga natabo sa diin ginpaidalom naman sa counseling ang amay kag duha sini ka mga kabataan sa pagpanguna sang Municipal Social Welfare and Development Office (MSWDO).
