Nagbalik na sa Vatican si Pope Francis matapos ang lima ka semana nga pagpakigbato sa double pneumonia sa ospital kun sa diin pila ka beses pa nga nangin kritikal ang iya kondisyon.
Sa labing-una nga tion halin sang Pebrero 14, naghimo man ang 88-anyos nga Santo Papa sang public appearance. Natabo ini sa balkonahe sang Gemelli Hospital sa Roma kun sa diin siya gin-admit.
Sakay sa wheelchair, nagyuhom kag nagtamyaw si Pope sa mga tumuluo nga nagahinugyaw kag nagasinggit sang iya pangalan sa idalom, makapila ka beses man ini nag-senyas sang “okay”, kag naghambal man sang iya pagpasalamat sa mahinay nga tingog.
Nagkinasadya naman ang mga tawo sang nag-special shoutout ang Pope sa 79-anyos nga babaye nga may dala nga yellow nga bulak bangud adlaw-adlaw gid ini nga nagakadto sa ospital samtang didto nagapaayo ang Pope.
Pagkatapos sadto, ginbyahe na si Pope, gin-updan sang police vehicles sa Roma, apang naghapit anay agud maghalad sang bulak sa Basilica of Saint Mary Major nga isa ka simbahan kun sa diin may espesyal nga debosyon si Pope Francis kag masami man niya gina-bisita.
Talalupangdon man nga sang yara na si Pope sa salakyan, may gintakod na naman nga gamay nga hose sa iya ilong agud nga maka-bulig sa iya nga makaginhawa sang maayo.
Una na ginsiling sang medical team nga nag-ayo na ang Pope sa double pneumonia, apang may yara gihapon sang complex infection kag madugayan pa nga dalayon nga mag-ayo bangud man sa iya edad.
Suno kay Sergio Alfieri, head sang medical team sang Pope, kinahanglan nga magpahuway ang Santo Papa sa sulod sang duha ka bulan kag maglikaw anay sa dalagku nga meetings samtang yara sa Vatican.
Matandaan nga sa masobra isa ka bulan ni Pope sa ospital, isa ka picture gid lamang ang gin-release sang Vatican kag ini amo ang laragway sang Santo Papa samtang nagapangamuyo ini sa chapel.
