Nagpahanumdom sa mga local candidate ang Iloilo City Commission on Elections (COMELEC) nga ginadumilian ang pagpangampanya sa Maundy Thursday kag Good Friday sa tion sang Semana Santa.
Sa interview sang Bombo Radyo kay Mr. Jonathan Sayno, Election Assistant Officer II sang City COMELEC, iya ginpahayag nga ang Abril 17 tubtob 18, 2025 ang isa ka balaan nga adlaw sa pag-obserba man sang Semana Santa sang simbahang-katolika.
Suno kay Sayno, wala man dapat sang social media posting halin sa bahin sang mga kandidato apang, kon ang supporters mismo ang mag-post, react, and share sang content sang local candidate, mahimo gid nila ini nga ubrahon.
Ginpahayag man sini nga antes ang adlaw sang eleksyon kag adlaw mismo sang eleksyon sa Mayo 11 kag 12, 2025, ginadumilian man ang magpangampanya sa social media man ukon sa personal.
Nahibaluan nga ang sin-o man ang indi magsunod sa amo nga mga pagsulundan ang magapangatubang sang kaso sa paglapas sa Comelec Resolution No. 11086 ukon ang Republic Act No. 9006 ukon Fair Elections Act.
