Nagmandu ang Civil Aviation Authority of the Philippines (Caap) nga indi anay pagpalupadon ang iban nga aircraft sang flying school nga amo ang naga-operate sang isa ka Cessna plane nga nagtibusok sa Lingayen, Pangasinan nga ginkamatay sang piloto kag iya student pilot.
Ang Cessna training aircraft nga may registration number RP-C8595 ang gina-operate sang Pilipinas Space Aviation Academy Inc.
Nag-crash ini kahapon sang aga kun sa diin gilayon pa nga gindala sa ospital ang mga sakay sini, apang ginbawian gid sang kabuhi.
Suno sa CAAP, naglunsar na sang pormal nga imbestigasyon ang otoridad kun ano ang rason sang insidente; kag samtang pending ang resulta, grounded anay ang flying school.
“Authorities have initiated a formal investigation to determine the cause of the incident. Meanwhile, the flying school is grounded pending the results of the ongoing investigation,” suno sa aviation authority.
Ginhawiran man ang mga pangalan sang biktima kag gin-una nga ipahibalo sa ila na mga pamilya, apang sa inisyal nga impormasyon, naga-edad sang 32-anyos nga piloto kag 25-anyos naman ang estudyante kag pareho nga lalaki.
