Nagmandu na ang Iloilo City Police Office (ICPO) sang matul-id nga imbestigasyon sa isa ka patrolman nga ginareklamo nga nagpanghilo sang inugbulang nga manok sa Coliseo de Leganes sa Brgy. San Vicente, Leganes, Iloilo.
Natabo ini sang Sabado, Marso 29, kun sa diin ang involved nga personnel ang ginapahayag nga naka-assign sa Police Station 7 sa syudad.
Suno kay Police Major Shella Mae Sangrines, spokesperson sang ICPO, kumpirmado nga didto ang presensya sang pulis, apang sa verification sa hepe, wala sang sanctioned ukon lehitimo nga operasyon ang police unit sa bulangan sang amo nga tion.
Ginsulit ni Sangrines ang zero-tolerance policy sang ICPO batok sa anuman nga porma sang illegal gambling kag misconduct sang mga katapo sang pulisya. Kun mapamatud-an sa mga ebidensya suno kay Sangrines, ipasaka ang kaso-administratibo batok sa patrolman.
Sa pagpakig-angot sang Bombo Radyo kay Police Captain General Enrique Robles, hepe sang Leganes Municipal Police Station, iya ginpahayag nga gin-turn over sa ICPO ang pulis samtang pending ang pre-charge investigation.
Suno kay Robles, gin-report ini sa ila sang alas dies sang gab-i sang Sabado kag gindala man ang tag-reklamo kag ang tropa sa police station.
Base sa separado nga impormasyon, wala nag-ako ang pulis sa pagpanghilo, apang nakita sa closed circuit television footage nga nagabalik-balik ang pulis sa inugbulang nga manok, tubtub nga nagpalangluya ini suno sa tag-iya.
MODELS OF INTEGRITY
Sa press statement nga ginpaguwa sang ICPO, ginsiling ni Director Police Colonel Kim Legada nga nagmandu na ini sa mga unit commander nga istrikto nga i-monitor ang ila nasakpan nga mga personnel. Ginpahayag sini nga wala sang itolerar nga involvement sa illegal gambling ukon kaangay man nga aktibidad.
“We will enforce discipline and, if warranted, file appropriate charges,” suno kay Legada.
Ginpahanumdom man sini sa police officers nga mangin ehemplo sa pagsunod sa layi: “Law enforcers must be role models of integrity. Any officer found violating this directive will face administrative and criminal consequences.”
Nagpanawagan man ini sa publiko nga mag-report gilayon kun may nahibaluan nga illegal gambling activities.#
(Not the actual photo*)
