Naglab-ot na sa malapit 3,000 ang numero sang napatay bangud sa 7.7 magnitude nga linog sa Myanmar.
Suno kay Myanmar military ruler Min Aung Hlaing, possible nga maglapaw pa sa 3,000 ang napatay matapos nga nakarecord na sang 2,719 sa pinakaulihi nga data.
Magluwas sa mga napatay, may yara man sang 4,521 ka mga nasamaran kag 441 missing.
Ang linog ang pinakaulihi sa serye sang mga trahedya sa amo nga pigado nga pungsod sang 53 million ka mga tawo kasunod sang 2021 coup nga nagbalik sang militar sa gahum kag nagguba sang ekonomiya matapos ang isa ka dekada nga development kag temopraryo nga demokrasya.
Nahibaluan nga ginaakusahan ang militar sang lapnagon nga kalakasan sa katuyuan sini nga magpabilin sa pagginahum kag bungkagon ang rebelyon nga natukod matapos ang kudeta, kag ang civil war ang nag-displace naman sang masobra sa 3 million ka mga tawo antes pa man ang linog.
Gin-report naman sang isa ka rebel group, ang Karen National Union, nga nagpatigayon ang military junta sang airstrikes sa nasidlangan sang pungsod sang tion nga mas hatagan kuntani sang prayoridad ang quake relief efforts.
Sa Thailand, nagsaka man sang 21 ang patay kasunod sang padayon nga pagpangita sa mga indibidwal nga posible natabunan sang nagkalatiphag nga mga building.
