Pagasayluhon na sa Negros Island Region (NIR) si Dr. Ramir Uytico nga nagapangalagad subong bilang director sang Department of Education (DepEd) Western Visayas.
Ginkumpirma ini ni Uytico sa iya Facebook page, kun sa diin nakasaad man nga ang mangin officer in charge assistant regional director sa amo nga rehiyon amo si Negros Occidental Schools Division Superintendent Anthony Liobet.
Sa iya post, nagpasalamat ang nasambit nga Education official kay DepEd Secretary Sonny Angara, Undersecretary Peter Irving Corvera, kag Undersecretary Wilfredo Cabral sa pagsalig nga ihatag sa iya ang pagdumala sa hanay sang edukasyon sa bag-o lang natukod nga rehiyon.
Nagpasalamat man ini sa mga lideres sang Negros Occidental sa paghatag sang rekomendasyon nga siya ang ibutang sa pwesto.
Naghatag man si Uytico sang mensahe sa Western Visayas nga ginabansagan “Home of the Champions.” Pahayag sini, indi man siya perpekto, apang ang sigurado amo nga nagserbe siya sa rehiyon nga puno sang dedikasyon kag integridad.
Kun balikan, nangin regional director si Uytico sang DepEd 6 sang Pebrero 2021. Sa idalom sang iya pagdumala sa Rehiyon Vi, lakip sa talalupangdon nga hinimuan amo ang Learning Continuity Plan sang tion nga may COVID-19 pandemic; Literacy and Numeracy Roadmap; uniform/simultaneous release sang sweldo sang mga manunudlo; reconciliation sang records sang DepEd-6 employees nga nangin problema sang naglinigad nga tinuig; Quality Management System; kag School Heads Academy.
Sa bag-o sini nga obligasyon, covered sang rehiyon ang Negros Occidental, Negros Oriental, kag ang Siquijor lakip na ang highly-urbanized city sang Bacolod.
Sa inisyal nga impormasyon, ang magabulos bilang director sa Western Visayas amo si OIC RD Cristito Eco sang National Capital Region kag magapabilin naman bilang OIC ARD si Dr. Miguel Mac D. Aposin.
Ginahulat pa ang order sang DepEd Central Office kun san-o mangin epektibo ini nga assignments.#
