Nagpaandam si Senator Ronald ‘Bato’ dela Rosa nga mahimo manabat kay United States President Donald Trump ang mga nagbulig nga madakop si former President Rodrigo Roa Duterte kag madala sa The Hague.
Nabuy-an ini nga statement kadungan sang una nga pagpakita ni Bato sa Senate hearing nga naangot sa Duterte arrest.
Ang ginatumod ni Bato amo ang executive order nga napirmahan ni Trump sang Pebrero 2025. Nakasaad diri nga may sanctions sa “non-American individual or organization” nga direkta nga naga-kooperar sa International Criminal Court (ICC) sa pag-detain sa isa ka “protected person.” ng ginatumod nga “protected persons” sa idalom sang amo nga order amo ang US nationals, US military personnel, kag citizens sang US NATO allies kag “major non-NATO allies.”
Ang mga pungsod naman nga nalakip sa major non-NATO allies amo ang Israel, Pilipinas, kag iban pa.
Suno kay Bato, isa ka “moral obligation” sang committee nga ipakigbahin ang findings kay Trump para nga manabat ang tag-iya sang Gulfstream nga eroplano nga ginsakyan ni Duterte sang ginlupad ini sa The Netherlands.
“It is a moral obligation of the committee to share our findings…to President Donald Trump para kung sino mang may-ari ng Gulfstream na ito na eroplano, kung may ari-arian siya sa Amerika eh covered siya sa executive order na pinirmahan ni President Trump,” pahayag sang senador kag former PNP chief.
Kun balikan ang mga hitabo, ginalantaw nga gusto anay ni Trump nga protektahan ang kaalyado sini nga si Israeli Prime Minister Benjamin Netanyahu nga gindagdagan man anay sang ICC arrest warrant bangud sa gyera sa Gaza. Bangud sadto, nagpaguwa sang executive order si Trump nga amo ang ginatumod ni Bato nga magahatag sang sanctions sa mga tawo nga magabulig sa ICC.
Yari ang kabahin sang order ni Trump: “The United States unequivocally opposes and expects our allies to oppose any ICC actions against the United States, Israel, or any other ally of the United States that has not consented to ICC jurisdiction.” Ang ginakahangaw-an nga epekto sini amo ang travel prohibitions, funding cuts halin sa US, ukon freezing sang US assets. Ini ang gusto matabo ni Bato kag particular sini nga gintumod kun sin-o man ang tag-iya sang chartered plane nga nagdala kay Duterte sa The Hague.
“Sigurado ako kung may-ari ka ng eroplano, mayroon kang ari-arian sa Amerika, kaya prepare for the repercussions of your actions, dahil very clear ‘yan sa executive order na in-issue ni President Trump,” suno kay Dela Rosa.
Pero naka-istorya na bala si Bato sa sin-o man nga US official para maduso ang sanctions? Ang sabat niya: “Secret.”
Nahibaluan nga Marso 11 sang gindakop si Duterte bangud sa ginaalegar nga crimes against humanity. Gin-set ang confirmation of charges sa Septyembre 23. Samtang wala pa ini, didto ang former president sa detention facility sa The Hague. Madamo ang nagapati nga bangud sa papel ni Bato sa PNP sang tion sang drug war, siya ang posible i-sunod nga dagdagan sang arrest warrant.#
