Nauyang na naman ang monster triple double sang Nuggets superstar nga si Nikola Jokic kadungan sang ikaapat nga sunod-sunod nga kalutusan.
Ginpierde sila sang Indiana Pacers, 125-120, sa mismo home court sang Denver.
Ini naman ang pang-apat nga sunod-sunod nga daog sang Pacers kag napabaskog ang ila pagkapyot sa ikaapat nga pwesto sa Eastern Conference.
Nagtapos si Jokic nga may 41 points, 15 rebounds and 13 assists nga amo na ang iya ika-32 nga triple-double sa sini nga season. Bisan pa nga yara si Christian Braun nga may 20 sang iya 30 points sa second half, nalutos gihapon ang Denver kag subong may record nga 47-32.
Sa sini nga hampang, 21 points man ang nahimo ni Jokic sa opening period nga amo ang pagpang-apat nga tion sa iya karera nga naka-20 plus siya sa first quarter.
Ang amo nga game amo man ang pang-lima nga sunod-sunod nga hampang nga wala nakaupod si Jamal Murray bangud sa injury, apang nagalaum si Coach Michael Malone nga makabalik ang iya star point guard sa pagsugod sang NBA playoffs.
