Mas palawigon pa sang mga barangay tanod sang Brgy. San Rafael, Mandurriao, Iloilo City ang ila nga duty kasunod sang pagpangkastigo sa call center agent.
Sa interview sang Bombo Radyo kay Punong Barangay Elmer Tiaño, iya ginpahayag nga nakasapol na sila kaupod ang katapo sang kapulisan agud nga gilayon maresolba ang problema nga natabo.
Suno kay Tiano, nagakoordinar na ang otoridad sa pila ka mga residente nga mahimo makahatag sang kuha sang closed-circuit television (CCTV).
Ginpahayag man sini nga indi nila mapamilyaran ang mga nakamotorsiklo nga nagkastigo sa call center agent.
Gintuad man sini nga makaalarma ang natabo sa biktima ilabi na nga kaagahon ini natabo.
Ginmanduan man ang punong barangay ang mga tanod nga tubtob alas-5 sang kaagahon magapatrolya agud masiguro hilway sa amo nga hitabo ang lugar.
