Posible nga nagatuyo ang China nga maglantaw kag sundan ang joint exercises sang Pilipinas kag Estados Unidos sang Amerika.
Ini ang ginalantaw sang Philippine Navy matapos nakit-an ang siyam ka mga barko sang People’s Liberation Army (PLA) Navy sa northern coast sang Luzon.
Lakip diri ang aircraft carrier nga Shandong (CV-17); anum ka escort warships lakip na ang destroyers kag frigates; kag may yara pa gid sang duha ka support vessels.
Suno kay Rear Admiral Roy Vincent Trinidad, Navy spokesperson for the West Philippine Sea, indi kinaandan ini nga pormasyon nga ila na-monitor.
Una sila nga nakit-an sang armadong kusog sang Pilipinas sang Martes, Abril 22. Sang Miyerkules, nakit-an na ang Chinese aircraft carrier sa distansya nga 115 nautical miles halin sa Sta. Ana, Cagayan.
Ginpahayag sang Navy officials nga ginasunod man sang Chinese vessels ang right of innocent passage nga ginapahanugutan sa idalom sang United Nations Convention on the Law of the Sea ukon UNCLOS. Apang ang problema suno sa Navy, nagaradyo ang Pilipinas apang wala nagasapak ang mga barko sang China.
“It is within our territorial waters but we cannot say for certain if they pose a real threat because their passage was expeditious,” suno kay Navy spokesperson Captain John Percie Alcos.“Their passage was expeditious and they did not stop in any part of their particular travel,” dugang sini.
Nahibaluan nga padayon subong ang Balikatan Exercises kun sa diin nalakip ang Multilateral Maritime Event (MME) sang naval forces.
Nagatutok ini nga aktibidad sa pagpaayo pa sang interoperability kag koordinasyon sang duha ka magkaalyado nga nasyon samtang yara sa sulod sang archipelagic waters sang Pilipinas — partikular na sa bisinidad sang Subic Bay pakadto sa Northern Luzon Joint Operational Area.
