Gin-athag sang Commission on Elections (COMELEC) Iloilo nga wala sila nakabaton sang report nga nagareklamo batok kay Police Colonel Bayani Razalan agud i-relieve ini sa iya pwesto.
Ini kasunod sang pag-relieve kay Police Colonel Razalan bilang Director sang Iloilo Police Provincial Office (IPPO).
Sa interview sang Bombo Radyo kay Atty. Renier Layson, Provincial Election Supervisor IV sang COMELEC Iloilo, iya ginpahayag nga maid-id nga ginasekyar sang ila talatapan ang mga ahensya kon may report batok sa mga pulis may kaangtanan sa 2025 midterm elections.
Suno kay Layson, wala sang report nga nagapatumod sang reklamo batok kay Razalan kasunod sang iya relieve.
Ginahulat man sini ang official notice sa paghalin sang anay Director.
Gintuad man ni Layson nga wala man siya naglaum nga ma-relieve sa pwesto si Razalan bangud sa nagahilapit na lang gid ang eleksyon.
Una na nga ginkumpirma sang Police Regional Office (PRO) 6 ang pag-relieve kay Razalan bilang Director sang Iloilo Police Provincial Office (IPPO) kag nagahulat na lang sa clearance halin sa COMELEC Central Office para maaprubahan ang pagrelieve kay Razalan.
Temporaryo naman nga magatal-us kay Razalan si Colonel Rolando Bulalacao, chief regional staff sang PRO 6.
