Ginapasiguro sang Metro Pacific Iloilo Water (MPIW) nga maka-provide pa sila sang 80 million liters kada adlaw nga tubig sa syudad kag probinsya sang Iloilo apisar nga summer season.
Sa interview sang Bombo Radyo kay Jerry Guillergan, Head sang MPIW Engineering Department, iya ginpahayag nga yara pa sa 80 million liters ang ginahatag nga tubig kada adlaw, kun sa diin makabig pa ini nga normal nga water level nga gina-provide nila sa consumers.
Suno kay Guillergan, may yara pa sang 40% nga non- revenue water nga bangud sa mga guba nga tubo sang MPIW.
Dugang pa niya, padayon na sila sa pag-ilis sang mga tubo partikular sa Barrio Obrero, Lapuz kag City Proper agud nga amat-amat nga mabuhinan ang non- revenue water.
Gin-athag man ni Guillergan nga wala sila nagdugang ukon nagbuhin sa deployment sang ila mga water tankers kag padayon ang pag-deploy sang 15 ka tankers kada adlaw.
Ginkumpirma man sang natungdan nga nagakuha sila sang tubig sa mga areas nga may mataas nga pressure kaangay sang Lanit, Jaro kag ini ang ginadala sa mga lugar nga kalabanan indi na malab-ot sang supply sang tubig.
