Liwat nga naglupok ang Bulkang Bulusan kagab-i kag nagbuga sang ashfall sa pila ka mga barangay sa Sorsogon.
Suno sa Philippine Institute of Volcanology and Seismology (DOST-PHIVOLCS), ang phreatic eruption nagluntad 7:43 PM kag naglawig sang ginabanta 77 minutes base sa seismic kag infrasound monitoring.
Pila sa mga lugar nga nalab-ot sang abo amo ang banwa sang Irosin, Juban, kag Bulan.
Nahibaluan nga nakarecord ang PHIVOLCS sang indi magnubo sa 54 volcanic earthquakes sang Biyernes.
Sa pihak sang paglupok, nagapabilin ang Alert Level 1 sa Bulusan nga indikasyon sang low-level unrest.
Apang nagpaandam ang otoridad nga mahimo may masunod pa nga mas madamo nga phreatic eruptions.
Ginadumilian naman ang pagsulod sa 4-kilometer Permanent Danger Zone (PDZ) kag ginapahalong ang mga tawo sa sulod sang 2-kilometer Extended Danger Zone (EDZ).
Gin-alerto naman ang civil aviation authorities nga abisuhan ang mg piloto nga likawan ang paglupad malapit sa summit sang bulkan bangu sa peligro nga dala sang abo sa eroplano.
