Ginpasalig sang Department of Education (DepEd) nga himakasan sini nga ma-address ang problema sa pagbasa kag paghangop sang mga estudyante.
Ini kasunod sang resulta sang 2024 functional literacy, education and mass media survey nga ginpatigayon sang Philippine Statistics Authority (PSA) kun sa diin nagguwa nga masobra sa 18 million junior high school graduates ang nabudlayan sa basic comprehension kag makabig nga functionally illiterate.
Suno kay Education Secretary Sonny Angara, ginapasangkad na sang ahensya ang mga intervention sini lakip na ang pagpaayo pa sang remedial kag literacy programs agud masiguro nga makalagas ang iban nga mga estudyante.
“Hindi namin hahayaang may batang nahuhuli sa pagbasa at pag-unawa. The recent FLEMMS (2024 Functional Literacy, Education, and Mass Media Survey) results on functional literacy highlight what we have long recognized—literacy must be at the heart of our education reforms,” kabahin sang statement sang opisyal.
Ginpadalom man ang teaching and assessment methods suno sa tiglikom kun sa diin ginatudluan ang mga estudyante sang critical thinking kag pag-angkon sang 21st century skills sa baylo nga magsaulo lamang.
Gin-ako man sang ahensya ang katungdanan sa functional literacy sa kada estudyante nga Pilipino.
Sa statement naman sang Alliance of Concerned Teachers (ACT), gintawag sini nga yara na sa “national emergency level” ang krisis sa edukasyon sa Pilipinas kun basehan ang findings sang PSA.
Lakip sa ginapanawagan sang grupo amo ang pagpasar sang House Bill 1783 ukon ang Education as Priority in the National Appropriations (EDNA) Act nga amo ang magamandu sang alokasyon sang at least six percent sang GDP sa sector sang edukasyon.
Ginaduso sang ACT nga doblehon ang pondo para masabat ang kakulangan sang classrooms, maka-hire sang dugang nga kuwalipikado nga mga manunudlo, mapataasan ang sweldo sang teachers kag education support personnel, makahatag sang quality learning materials kag maka-implementar sang epektibo nga literacy interventions.
