Nagahilibion nga nag-sorry ang isa ka content creator matapos ini ginpasakaan sang reklamo sang National Bureau of Investigation (NBI) bangud sa ginapalapta sini nga fake news sa iya vlog.
Nangin content ni alias Jenny amo ang ginaalegar pag-agaway sang NBI kag Philippine National Police sang P10-million nga reward money kasunod sang pagdakop kay Pastor Apollo Quiboloy nga may kaso nga sexual abuse.
Suno kay NBI Director Jaime Santiago, gin-claim sang vlogger nga ginpapundo sang PNP ang salakyan sang NBI. Naghimo ini sang istorya sa amo nga anggulo, apang ang video sini nga ginpakita ang natabo kadungan sang lehitimo ukon ordinary lamang nga checkpoint sa Davao City.
Ginklaro ni Santiago nga wala sang away ang NBI kag ang PNP —baliskad sa ginapalapta sang vlogger— kag ginpalakat man gilayon ang salakyan sang bureau sang nakaagi sa checkpoint.
Nagpaguwa na sang public apology ang vlogger, kag nag-ako nga luyag lang sini makaangkon sang likes kag followers rason nga na-post niya ang amo nga ‘fake news’.
Apisar sini, ginatun-an pa gihapon sang NBI ang kaso dala ang paandam sa iban nga himuon ini nga leksyon nga maghalong gid sa pagpalapta sang mga impormasyon ilabi na ang nagatuyo nga maghalit sa anuman nga ahensya sang gobyerno.
