Siyam ka mga tawo ang napatay sa buslanay sang atake sang Ukraine kag Russia.
Natabo ini inoras lamang matapos ginpirmahan sang Ukraine kag kag Estados Unidos sang Amerika ang agreement nga makahatag sang access sa U.S. sa mineral resources sang Kyiv.
Sa Kherson region sa southern Ukraine, pito ang patay kag masobra sa 20 ka iban pa nga mga tawo ang pilason bangud sa ginaalegar nga drone attack.
Base naman sa Ukrainian emergency services, nagpatigayon man ang Russia sang drone strike sa Black Sea port city sang Odesa kun sa diin duha ang patay kag 15 ang pilason. Naigu sang drone ang apartment buildings, private homes, supermarket kag eskwelahan.
Nagapakita ini suno kay Ukrainian President Volodymyr Zelenskyy nga wala ginasapak sang Russia ang U.S. proposal sa full and unconditional ceasefire sa masobra na sa 50 ka adlaw.
Antes sini nga atake, ginpirmahan sang US kag Ukraine ang agreement sa vast mineral resources nga amo man ang ginatudlo nga mangin kabaylo sang military aid sa Kyiv. Ini suno kay Zelensky ang una nga resulta sang ila naistoryahan ni US President Donald Trump sang nagkit-anay sila sa Vatican kadungan sang lubong ni Pope Francis.
