Ginpahanumdom sang isa ka doctor ang pagpabilin sang proper hygiene agud nga malikawan ang pag-angkon sang arikis kag paglaton sini sa iban nga mga tawo ilabi na sa mga kaupod sa balay.
Ang arikis ang ginadala sang Sarcoptes scabiei var hominis nga sarang makatinir sa lawas sang tawo sa malawig nga tion.
Sa interview sang Bombo Radyo kay Dr. Rema Joy Cejar, Fellow sa Philippine Dermatological Society kag head sang Western Visayas Medical Center-Dermatology Section, iya ginpahayag nga nagalaton ang kagaw paagi sa close contact sa iban nga mga tawo.
Mahimo man ini maglaton kun naga-share sang ulunan, bedsheets, habol kag iban pa nga mga gamit sang infected nga tawo.
Ini ang rason suno kay Cejar nga dapat masami gid nga magpaninlo kun may infected person na sa panimalay, kag dapat man nga mag-isolate ukon indi na mag-impon sa iban nga mga tawo agud indi magsaylo ang kagaw.
Pahayag ni Cejar, indi madala ang arikis sa simple lang nga pagpanghabon, gani nga may lista sang recommended lotion ukon bulong nga ginahatag ang doctor agud mapatay ang kagaw kag mauntat ang pagpalangatol ilabi na kun gab-i.
Ginpanumdom man sang doctor nga likawan nga maggamit sang dagom ukon magsunog sa infected area sang lawas kun may arikis bangud mahimo ini magtuga sang lain na naman nga problema.
