Nagpagwa sang pahayag ang Catholic Bishops’ Conference of the Philippines (CBCP) sa tunga sang kontrobersyal nga may kaangtanan sa isyu sang clerical sexual abuse, kasunod man sa pagdepensa kay Cardinal Luis Antonio Tagle, pila ka adlaw antes magsugod ang conclave sa Vatican para sa masunod nga Santo Papa.
Naghatag sang warning ang watchdog group nga Bishop Accountability.org nga indi masaligan sanday Tagle kag Italian Cardinal Pietro Patrolin sa pagprotekta sa mga kabataan, samtang ginaakusaran sang co-director sang grupo nga si Anne Barrett Doyle, nga ang simbahan sa Pilipinas nagapabilin sa “dark ages”.
Ginpahayag sang CBCP nga ang pag-atubang sa mga reklamo batuk sa kaparian dapat ginahimo sang mga diocesan bishops ukon religious superiors, kag indi ini sakop sang obligasyon ni Cardinal Tagle.
Ginkilala man sang CBCP ang papel ni Tagle bilang anay Arsobispo sang Manila halin 2011 tubtub 2019, sa pagbulig sang paghimo sang “Pastoral Guidelines on Sexual Abuses and Misconduct by the Clergy” sang tuig 2003.
Gin-athag man sang simbahang katoliko nga wala na sang direct nga otoridad si Cardinal Tagle sa bisan ano nga diocese sa Pilipinas halin sang na-assign ini sa Roman Curia.
Madumduman nga ginpahayag ni Doyle nga wala pa nabutang sa website sang archdiocese sang Manila kag Catholic Bishops’ Conference of the Philippines (CBCP) ang mga pagsulundan tuhoy sa mga kaso sekswal.
Nahibaluan man nga nagpagwa sang mabaskog nga kritisismo si Doyle batuk kay Cardinal Parolin, nga ginpakilala niya bilang “consummate secret-keeper”.
Suno pa kay Doyle, kun si Parolin pa ang mapilian nga masunod nga Santo Papa, padayon na nga madula ang paglaum sang transparency sa isyu sang sexual abuse sa simbahan.
