Kasuhan sang Philippine National Police (PNP) ang isa ka vlogger nga nagpalapta sang fake news nga magapatigayon sang raid ang mga pulis sa balay ni former president Rodrigo Duterte.
Suno kay PNP chief Gen. Romel Marbil, nakilala na nila kun sin-o ini nga vlogger nga ginaalegar naka-base sa Davao City.
Ginpa-freeze man ang ebidensya kag nagpamalibad anay ang pulisya nga isapubliko ang pangalan.
“We already identified this vlogger who is spreading fake news, we have already asked to freeze the evidence. I don’t want to name the person but we’ll be filing a case,” suno kay Marbil.
Matandaan nga bangud sa impormasyon nga ginpalapta nga may raid, nagtinipon man ang mga supporters sang mga Duterte sa atubang sang iya balay, kag ang iban naman ang nag-check pa sang puluy-an sang iban nga katapo sang Duterte family.
Una naman nga gin-athag sang Davao Region Police Office nga wala sang scheduled operation ang anuman nga law enforcement unit sa balay sang anay punong ehekutibo.
Sa bahin sang PNP, matandaan nga naglunsar na ini sang gyera batok sa fake news sang nagtukod ini sang Joint Anti-Fake News Action Committee (JAFNAC) sang Mayo 2.
“We want to stop those who are spreading fake news. This is a war we must fight and win not with weapons but with vigilance, individual responsibility and collective will because in defending truth, we defend what is right. In protecting truth, we protect our people,” dugang sang PNP chief.
