Nanindugan ang Commission on Elections-Ajuy nga wala pa sang kumpirmado nga insidente sang vote buying sa amo nga banwa.
Sa interview sang Bombo Radyo kay Ester R. Abisan, Election Officer III sang Comelec Ajuy, iya ginpahayag nga may nagkadto nga isa ka persona sa ila talatapan kahapon nga adlaw, Mayo 9, kag nagreport nga may ara sang vote-buying nga nagakatabo sa isa ka beach resort sa Barangay Malayuan.
Gilayon man ini nga gin-aksyunan sang Comelec Ajuy, sa pagpanguna sang Philippine National Police, nga amo ang nagpadulong sa nasambit nga beach resort agud kumpirmahon ang nasambit nga report.
Apang wala ini sang may napakita nga ebidensiya kag wala man nagsiling kon sin-o nga kandidato ang nagapamakal sang boto.
Dugang pa sang opisina, kun may yara gid man sang reklamo, dapat nga pormal ini ukon isa ka written complaint, verified kag notarized.
Nagpahanumdom man si Abisan sa mga Ajuynon nga indi gid magbaton sang bisan ano nga kwarta bilang kabaylo sang ila boto, bangud kun madakpan, posible ang mga ini ang magapangatubang sang kaso.
(Article: Bombo Volunteer Renan Jay Salico)
