Nagbalos sang kontra-atake ang Pakistan sa mga air base sang India matapos ang ginreport nga pagtupa sang mga missile halin sa India sa tatlo ka air base sang Pakistan.
Ginpahayag sang militar sang Pakistan nga gintarget nila kag gin-igo ang madamo nga mga pasilidad sang militar sa India kag sa ginakabig nga India-administered Kashmir.
Lakip sa mga gin-atake nga target amo ang Brigade Headquarters sa KG Top, Field Supply Depot sa Uri, Artillery Gun Position sa Derangyari, BrahMos battery site sa Nagrota, Udhampur airfield, Pathankot airfield, kag Suratgarh airfield.
Ginpunto man sang Pakistan nga kadam-an sa mga nasambit nga location yara sa malapit ukon yara mismo sa de facto border nga nagapatunga sa ginaagawan nga Kashmir region sa tunga sang New Delhi kag Islamabad.
Ginklaro sang Pakistan nga ang mga airfield nga Pathankot (Punjab state) kag Suratgarh (Rajasthan state) yara gid mismo sa sulod sang undisputed nga teritoryo sang India.
Dugang pa sang Pakistan military, ini nga operasyon isa ka “eye for an eye” nga balos sa ginpatihan nila nga paggamit sang India sang nasambit nga mga air base sa paglunsar sang missiles batuk sa ila.
Sa subong, wala pa sang komento ang kampo sang Ministry of Defense sang India kag Indian Air Force sa gina-angkon sang Pakistan.
