Bug-os ang pagbaton ni Iloilo City Vice Mayor Jeffrey Ganzon sa iya nangin kalutusan sa pagka-bise alcalde sa bag-o lang natapos nga eleksyon.
Sa interview sang Bombo Radyo kay Ganzon, outgoing Vice Mayor sang Iloilo City, iya ginpahayag nga hugot sa iya tagipusuon kag iya ginarespeto ang nangin desisyon sang pumuluyo sang syudad sang Iloilo ilabi kag labaw sa tanan sa kun ano ang kabubut- on sang Ginoo sa iya kabuhi.
Nagalaom siya nga mapadayon ang maayo nga pagserbisyo sa pumuluyo sang mga katapo sang Sangguniang Panlungsod sa pagpamuno ni Vice Mayor Elect Love Love Baronda.
Nagapasalig man ini sa mga pumuluyo nga apisar nga wala siya ginhatagan sang kahigayunan nga padayunon ang iya serbisyo, magapabilin sa gihapon ang iya pagpalangga sa mga pumuluyo sang syudad sang Iloilo.
Nagapasalamat man si Ganzon sang mga tawo nga padayon nga nagasalig kag nagasuporta sa iya ilabi na sa pila ka tuig niya nga pagserbisyo sa syudad.
