Wasak ang nauna nga bahin sang truck matapos nakabunggo sa pader sa Brgy. Airport, Mandurriao, Iloilo City.
Ang driver amo ang 53-anyos nga lalaki nga residente sang amo man nga distrito samtang upod sini ang 28-anyos nga pahinante nga residente sang Progreso, Ajuy.
Sa interview sang Bombo Radyo kay Patrolman Jonell Alimodian, traffic investigator sang Traffic Enforcement Unit, iya ginpahayag nga halin sa R. Mapa ang truck nga may karga nga boneless bangus kag padulong kuntani sa banwa sang Dumangas.
Base sa pahayag sang mga sakay sang truck, may nasugat-an ini sila nga salakyan nga naka-high beam rason nga nasilawan ini kag nakabunggo sa pader.
Base sa inisyal nga assessment sang kapulisan, nagapanimaho sang makahulubog nga ilimnon ang driver sang truck kag ginpahayag nga halin ini sa pistahan.
Nakaagum ang duha sang pilas sa ila nagkalain-lain nga parte sang lawas apang natam-an ang pahinante bangud sa passenger seat ang laban nga naigo apang nakalumpat ini.
Padayon nga ginabulong sang Western Visayas Medical Center (WVMC) ang mga sakay sang truck.
(Article: Bombo Phauline Pillora)
