Ginpahayag sang Philippine Coast Guard (PCG) nga magapadala sila sang duha ka barko agud masiguro ang safety sang “Atin Ito” coalition sa ila ikatlo nga misyon sa West Philippine Sea (WPS) halin Mayo 26 tubtob Mayo 30, 2025.
Suno kay Commodore Jay Tarriela, spokesperson sang PCG para sa WPS, isa ka 97-metro kag isa ka 44-metro nga barko ang ila ipadala bilang suporta sa seguridad sang misyon, bisan pa man nga ini isa ka civilian-led nga inisyatibo.
Ginpahayag ini nga tikang kasunod sang insidente sa Pag-asa Island, kun sa diin gin-bombahan sang water cannon sang Chinese Coast Guard (CCG) ang BRP Datu Sanday nga nagahimo sang marine research.
Duha ka beses ini nga gin-atake, rason nga ginpabaskug sang PCG ang ila presensya sa lugar.
Sa pihak sang tensyon, ginpabutyag ni Alexander Lopez, spokesperson sang National Maritime Council, nga ginahangkat nila ang “Atin Ito” nga ipadayon ang ila misyon.
Suno sa iya, may yara na sila sang contingency plans kun magluntad ang anuman nga problema.
Kabahin man sang misyon ang isa ka peace concert nga pagahiwaton sa Palawan, kun sa diin magatambong ang pila ka kilala nga Filipino kag international nga mga artista bilang suporta sa kalinong kag soberanya sang Pilipinas sa WPS.
