Nagapanawagan ang Catholic Educational Association of the Philippines (CEAP) kay President Ferdinand Marcos Jr. nga ibalik si anay senador Sonny Angara bilang Secretary sang Department of Education (DepEd).
Ginpahayag sang CEAP nga nagalaum sila nga hatagan sang Presidente sing bili ang mga nahimo ni Angara sa DepEd kag ini siya ibalik sa puwesto, bangud man sa iya nga madinalag-on nga pagserbisyo sa edukasyon sang Pilipinas sa sulod lang sang malip-ot nga tion.
Ang panawagan nagtuhaw matapos ang mando ni Presidente Marcos sang Mayo 22 nga nagapangayo sang “courtesy resignation” halin sa tanan nga miyembro sang iya gabinete.
Madumduman nga si Angara ang isa sa nagsumiter sang iya resignation sa amo man nga adlaw bilang sabat sa mando sang Presidente.
Ginkilala sang CEAP ang kontribusyon ni Secretary Angara sa pag-atubang sa mga problema sa sektor sang edukasyon.
Ginpanindugan sang CEAP nga importante ang padayon nga liderato kag kalig-on sa Department of Education ilabi na sa tunga sang mga reporma kag pagbakod sang sistema sang edukasyon pagkatapos sang pandemya.
Suno pa sa CEAP, dapat likawan nga matandog sang politika ang sektor sang edukasyon agud magpadayon ang kauswagan.
Ang CEAP, nga may kapin 1,525 ka miyembro nga eskwelahan kag 120 ka mga superintendent sang Katolikong eskwelahan, amo ang pinaka-daku nga organisasyon sang Katolikong eskwelahan sa pungsod kag isa sa mga nagapanguna sa paghubog sang mga polisiya kag reporma sa edukasyon.
