Ginhatagan sang mando ni Executive Secretary Lucas Bersamin ang mga law enforcement agents nga pasangkaron pa ang pagpangita kag pagdakop kay anay pulis Rafael Dumlao III nga una na nga na-convict bangud sa pagkidnap kag pagpatay sa South Korean businessman nga si Jee Ick Joo sang tuig 2016.
Si Bersamin nga amo man ang nagapungko bilang chairman sang Presidential Anti-Organized Crime Commission (PAOCC), nag-issue sang direktiba sang Mayo 21.
Ginpahayag ini pagkatapos sang ginpatigayon nga meeting sang Presidential Anti-Organized Crime Commission (PAOCC) kaupod ang mga opisyal sang Korean Embassy sa Manila.
Nagpahanumdom ang PAOCC sang P1 million nga reward sa sin-o man ang makabulig sa pagdakop kay Dumlao.
Ginpahayag niya nga kahuluya gid nga tubtob subong wala sagihapon nadakpan si Dumlao apisar pa nga ginpamatud-an na sang Court of Appeals (CA) ang iya sala.
Suno kay Bersamin ang krimen natabo mismo sa sulod sang Philippine National Police headquarters sa Camp Crame.
Ginpagwa si Dumlao sa PNP Custodial Center sa Quezon City matapos gin-abswelto sang Regional Trial Court sa Pampanga sang 2019, apang ang desisyon ang ginbaliskad sang Court of Appeals sang Hunyo 2024.
Madumduman nga gin-sentensyahan si Dumlao sang reclusion perpetua kun sa diin wala sang posibilidad nga pyansa, kag ginmanduan nga magbayad sang P350,000 para sa kaso nga kidnapping with homicide, kag P225,000 para sa kidnapping kag serious illegal detention.
