Ginkumpirma sang Office of the Vice President nga magalupad padulong sa Qatar kag Netherlands si Vice President Sara Duterte umpisa subong nga Lunes, Mayo 26 tubtob Hunyo 4, 2025.
Una nga bisitahon ni VP Sara ang Qatar kun sa diin nakaplastar ang iya nga mga aktibidad kaupod ang Filipino community.
Magabisita si VP Sara sa isa ka health center kag salon kun sa diin nagatrabaho ang pila ka Pinoy.
Pagasundan ini sang “brunch” sa isa ka food court, afternoon snacks kag dinner naman kaupod ang mga grupo sang Filipino community leaders kag supporters.
Samtang sa Mayo 30 tubtob Hunyo 3 naman ginalauman nga liwat nga bisitahon sang Bise Presidente ang iya nga amay nga si anay Presidente Rodrigo Duterte nga yara sa kustodiya sang International Criminal Court (ICC) sa The Hague, Netherlands.
Magapakigkita man si VP Sara sa ila nga mga tagasuporta sa gwa sang ICC para sa isa ka gathering.
Ginalauman nga magbalik sa Pilipinas ang Vice President sa Hunyo 4.
