Sulod na naman ang Pilipinas sa listahan sang 10 worst countries para sa mga mamumugon.
Santo ini sa International Trade Union Confederation (ITUC) Global Rights Index nga ginpaguwa kahapon, Hunyo 6.
Suno sa Workers Rights Watch nga amo ang nag-release sang report, ini na ang pang-siyam nga sunod-sunod nga tuig nga nalakip ang Pilipinas sa sini nga listahan.
Kaupod sang Pilipinas sa Top 10 amo ang Bangladesh, Belarus, Ecuador, Egypt, Eswatini, Myanmar, Nigeria, Tunisia, kag Turkey.
Base sa report, ang kinamatarong nga magpatigayon sang strike amo ang pinaka-ginalapas nga kinamatarong sang mamugon sa Pilipinas nga nagalab-ot sa 87%.
Ginasundan ini sang gina-violate man nga right to collective bargaining agreement nga 80%; ang right to establish or join union sa 75%; kag ang right to justice sa 72%.
Ginpahayag sang grupo nga kadamo pa sang dapat nga ubrahon agud nga mag-updanay na ang gobyerno kag employers para makakas ang Pilipinas sa sini nga lista.
Nahibaluan nga nalakip sa Workers Rights Watch ang Federation of Free Workers, Kilusang Mayo Uno, Unyon ng mga Manggagawa sa Agrikultura, National Federation of Sugar Workers, Alliance of Concerned Teachers. Kilusan ng Manggagawang Kababaihan, Confederation for Unity, Recognition and Advancement of Government Employees, Public Services Labor Independent Confederation, Bukluran ng Manggagawang Pilipino (BMP), Migrante Philippines, kag ang Center for Trade Union and Human Rights.
