Masako na ang Commission on Elections (COMELEC) Region 6 sa preparasyon para sa 2025 Baranggay and Sangguniang Kabataan Elections (BSKE) sa Disyembre apisar pa sang mga huring-huring nga indi ini madayon.
Sa interview sang Bombo Radyo kay Atty. Dennis Ausan, regional director sang Comelec Western Visayas, iya ginpahayag nga santo ang ila preparasyon sa kun ano ang nakabutang sa layi nga hiwaton ang eleksyon sa December 1, 2025.
Magalain lamang ini kun may bag-o nga layi nga ipasar sa Kongreso nga magapaiway sang piniliay.
Ang House Bill No. 10344 nga amo ang nagaduso nga i-reset ang 2025 BSKE sa katapusan nga Lunes sang October 2026 ang pending pa gihapon sa Committee on Suffrage and Electoral Reforms halin sang May 8, 2024.
Suno kay Ausan, lakip sa ila ginahimo amo ang imbentaryo sang available nga registration forms, pagpasiguro nga wala sang deperensya sa mga makina kag iban pa nga paraphernalia, kag paghanda man sang gamiton nga ballot boxes.
Una na nga gin-release sang poll body ang calendar of activities para sa nasambit nga eleksyon.
Lakip sa balantayan nga mga petsa amo ang Hulyo 1 tubtub 11, 2025 nga amo ang voter registration kag applications for membership sa Katipunan ng Kabataan (KK).
October 1 to October 7 ang filing sang certificates of candidacy; October 27 to December 31 ang election period; November 20 to November 29 ang campaign period; samtang sa Disyembre 1 naman ang election day.
Sa bilog nga election period, ipatuman sang poll body ang key provisions sang Batas Pambansa Blg. 881 (Omnibus Election Code) lakip na ang pagdumili sa mga armas luthang.
