Nagtay-ug ang mabaskug nga 6.3 magnitude nga linog nga nagdugay naman sa pila ka segundo, natabo sa Colombian Capital of Bogota sini nga Dominggo, ini suno sa United States Geological Survey.
Natabo ang linog malapit sa siyudad sang Paratebueno sa tunga-tunga nga bahin sang Colombia, mga 170 kilometros (105 ka milya) sa sidlangan sang Bogota, suno sa US Geological Survey (USGS).
Wala man sang nareport nga casualties matapos ang linog nga nabatyagan man sa mga siyudad sang Medellin, Cali kag Manizales sa Colombia.
Ang linog, nga ginrekord sang Colombian National Geological Survey nga may kusog nga magnitude 6.5, amo ang isa sa pinakamakusog kag pinakamalawig nga nabatyagan sa kapital sa mga nagligad nga tuig.
Ginpahayag sang mayor sang Bogota nga si Carlos Fernando Galan nga ginpaaktibo na ang tanan nga mga disaster agencies.
Ang pungsod yara sa Pacific ‘Ring of Fire,’ isa ka arko kun sa diin may mabaskog nga aktibidad sang linog kag bulkan, nga ginalakipan sang mga nagabunggo nga tectonic plates halin sa Japan, Southeast Asia, kag nagalab-ot tubtob sa Pacific basin pakadtu sa South America.
Text by: Bombo James Daccer Silverio
