Kritikal sa ospital ang isa ka lalaki matapos mabun-an sang iya upod nga nagahampang sang pusoy sa isa ka namatyan sa Project 5, Barangay Sooc, Arevalo, Iloilo City subong nga gab-i.
Ang biktima amo si Alyas Rocky, legal ang edad residente sang nasambit nga barangay kag ang suspek amo si Alyas Dodong, legal ang edad kag residente sang probinsya sang Iloilo.
Sa interview sang Bombo Radyo kay Police Staff Sergeant Vergel Deatras, imbestigador sang Iloilo City Police Station (ICPS) 6, iya ginpahayag nga samtang nagahampang sang pusoy ukon baraha ang duha sa namatyan, may natabo nga pagbinaisay sa tunga nila kag didto na nga nagdesisyon ang suspek nga magpauli sa ginatiniran niya nga balay malapit sa namatyan, apang ginlagas ini kag sang masulod na kuntani ang suspek sa ila nga kudal, ginbutong ini sang biktima kag nagpukotay apang bangud nga may dala na nga kutsilyo ang suspek, gilayon nga ginbuno niya ang biktima.
Suno kay Deatras, pilas sa nawala nga bahin sang tiyan ang naangkon sang biktima kag suno sa ma residente nga nakakita, nagguluwa gid ang tinae sini bangud sa pilas nga naangkon.
Gilayon man nga ginhingagaw dala sa malapit nga ospital ang biktima agud madapatan sang nagakaigo nga pagbulong.
Narecover man sa crime scene ang kitchen knife nga gingamit sa krimen.
Sa subong, padayon pa ang hot pursuit operation sang ICPS 6 sa suspek nga nakapalagyo.
Text by: Bombo Hanna Andasa
