Ginmanduan sang acting Regional Director sang Police Regional Office (PRO) 6 ang mga kapulisan sa Western Visayas nga indi na paglaktan sang tulog ang ila nga trabaho ilabi na kun nagapatrolya.
Sa mensahe ni Police Brigadier General Josefino Dico Ligan matapos ang Turnover and Assumption of Office Ceremony kahapon, iya ginpahayag nga walo ka oras na lang ang duty shift sang police personnel gani nga indi na dapat nga magbiya pa ang pulis sa pwesto agud magligoy.
Pahayag sini, dapat nga may yara gid sang commitment kag maghatag sang serbisyo nga may tagipusuon.
Matandaan nga may adjustment sa oras sang duty sang mga pulis matapos ginpahayag ni PNP chief General Nicolas Torre III nga indi na epektibo ang 12-hour duty shift bangud tuman ini ka kapoy.
Ini ang rason nga luyag sini nga ma-implementar ang labor law standards.
Suno naman kay Ligan, mangin epektibo gid ang pulis kun ginalakipan sini sang pagpalangga ang iya nga serbisyo.
Nahibaluan nga antes na-assign diri sa Western Visayas, nagserbe si Ligan bilang district director sang Northern Police District sa idalom sang National Capital Regional Police Office.
Na-assign man siya anay sa Eastern Police District, Quezon City Police District, kag Cebu City Police Office.
Siya ang nagbulos kay Brig. Gen. Jack Wanky nga subong na-designar bilang regional director sang PRO-4A ukon sa CALABARZON.
