Dakop ang isa ka street-level individual (SLI) sa ginpatigayon nga drug buy-bust operation sang Station Drug Enforcement Team (SDET) sa Brgy. Cabugao Viejo, San Enrique, Iloilo.
Ang subject ang ginkilala kay alyas “Intsek”, 34, kasado, wala sang trabaho, kag residente sang nasambit nga lugar.
Sa interview sang Bombo Radyo kay Police Lieutenant Cristy Val O Dalde, Officer-in-Charge sang San Enrique MPS, iya ginpahayag nga nadakpan ang subject bangud sa mga impormasyon nga ila nabaton halin sa mga pumuluyo sang amo nga Barangay.
Suno kay Dalde, natigayon nga marecober ang ginabulubanta 10 grams sang suspected shabu nga may standard drug price nga P68,000.00.
Nakuha man sa iya posisyon ang isa ka motorsiklo nga ginapatihan nga ginagamit sa iya iligal nga aktibidad.
Sa subong, yara na sa kustodiya sang San Enrique MPS ang nadakpan kag natalana nga pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
