Ginbawi na sang Department of Agriculture (DA) ang temporaryo nga ban sa pag-import sang manok halin sa Netherlands.
Ini nga desisyon nag-abot pila ka bulan matapos ginpunggan sang DA ang pagsulod sang mga produkto pareho sang manok, wild birds, karne sang manok, piso, itlog, kag semilya halin sa amo nga nasyon bangud sang balita nga may bird flu outbreak didto sang Nobyembre sang nagligad nga tuig.
Ginpirmahan ni Agriculture Secretary Francisco Tiu Laurel Jr. ang Memorandum Order No. 31 nga naga-lift sang ban matapos kumpirmahon sang mga global animal health authorities nga ang Netherlands wala na sang Highly Pathogenic Avian Influenza (HPAI) cases.
Ginpahayag man sang DA nga wala na sang bag-o nga kaso halin pa sang tunga-tunga sang Mayo.
Epektibo gilayon ang mando kag magapadayon tubtob nga ini masuspender o mabalik liwat.
Bangud nabuksan na liwat ang koneksyon sa isa sa mga nagapanguna nga poultry producer sa Europa, ginapaabot sang DA nga mas mag-maayo ang availability sang poultry products sa lokal nga merkado kag mas maayo ang pagdumala sang supply diri sa sulod sang pungsod.
