Nagsaka sa 58 porsyento ang kaso sang dengue sa probinsya sang Iloilo sa subong nga tuig, base sa datos sang Provincial Health Office (PHO), kun ipaanggid sa pareho nga period sang nagligad nga tuig.
Sa interview sang Bombo Radyo kay Dr. Maria Socorro Quiñon, PHO Head sang Iloilo, nagdangat na sa 2,511 ka kaso sang dengue ang narecord halin sang Enero tubtob Hunyo 20, 2025, upod ang napulo (10) ka napatay; ini mas mataas kumpara sa 1,586 ka kaso kag lima (5) ka patay nga narecord sa amo man nga period sang 2024.
Ginpahayag ni Dr. Quiñon nga may mga kabaranggayan na sa probinsya ang may ginreport nga kaso, kag ang San Joaquin ang nangin pinakataas sa subong.
Ginasundan ini sang mga banwa sang Oton, Dumangas, Leon, Cabatuan, Pototan, Lambunao, Janiuay, Calinog, kag Pavia.
Nagapanawagan ang PHO sa publiko nga maghalong kag maghimo sang mga preventive measures batok sa dengue, pareho sang regular nga pagpanglimpyo sa palibot, pagpanakop sang tubig sa bukas nga mga container, kag paglikaw sa kagat sang lamok.
