Ginpalab-ot ni Pope Leo XIV kay Ukrainian President Volodymyr Zelenskiy nga handa ang Vatican nga magpatunga kag mag-host sang peace talks sa tunga sang Russia kag Ukraine.
Ginpaambit niya ini sang nagkitaay sila sang Ukrainian leader sa ikaduha na nga tion sa sulod sang duha ka bulan sang iya pagpungko bilang Santo Papa.
Sa statement sang Vatican, ginsiling nga nag-istoryahanay sanday Zelensky kag Pope Leo sa Castel Gandolfo ukon sa lugar kun sa diin nagabakasyon subong ang Holy Father.
Didto naman si Zelensky sa Italya agud magtambong sa conference halin Hulyo 10-11 nga ginalauman nga magtutok sa pagbangon kag long-term reconstruction sang Ukraine kasunod sang invasion nga ginmandu ni Russian President Vladimir Putin.
Una nagkitaay sanday Pope kag Zelensky sa Vatican sang Mayo 18.
Naka-istoryahanay man si Pope Leo kag si Putin sa telepono sang Hunyo 4 kun sa diin gin-engganyo sini ang Russian leader nga tapuson na ang tatlo ka tuig nga gyera.
Una na nga ginpahayag sang Russian officials nga indi seryoso nga venue ang Vatican para sa peace talks bangud ang Holy See ang ginapalibutan sang Italya, isa ka myembro sang NATO nga nagasuporta sa Ukraine.
